JET yahamasisha waandishi kuripoti habari za mazingira

 

Katibu mtendaji wa Chama cha Waandishi wa Habari Mazingira Tanzania (JET) John Chikomo, akitoa taarifa yake ya utendaji pamoja na fedha mbele ya mkutano mkuu wa mwaka 2013 wa chama hicho. Mkutano huo uliohudhuriwa na wananchama wengi, ulifanyika kwenye ukumbi wa mikutano wa hoteli ya Lion iliyopo Sinza jijini Dar-es-salaam.Wa pili kushoto (waliokaa) ni mwenyekiti wa JET, Johnson Mbwambo na anayefuata ni katibu christom Rweyemamu na wa kwanza kulia ni mjumbe wa kamati ya bodi.

Na Nathaniel Limu, Dar es Salaam

MWENYEKITI wa Chama cha waandishi wa habari mazingira Tanzania (JET),Johnson Mbwambo,amewahimiza wanachama kuongeza juhudi kuandika habari na makala zinazohusu mazingira, ili pamoja na mambo mengine, nchi yetu iwe mahali salama pa kuishi.

Mbwambo aliyasema hayo mwishoni mwa wiki wakati akifungua mkutano mkuu wa JET  wa mwaka 2013,uliofanyika kwenye ukumbi wa hotel ya Lion iliyopo Sinza jijini Dar-es-salaam.

Alisema uharibifu wa mazingira ni mkubwa mno hivi sasa,na pamoja na madhara yake mengi,pia unatishia nchi kugeuka kuwa jangwa.

Mbwambo alisema kuiepusha nchi kugeuka jangwa,kila mwanachama wa JET anao wajibu wa kuandika habari na makala nyingi zinazoelimisha jamii juu ya madhara ya uharibifu wa mazingira.

Baadhi ya wanachama wa JET kutoka mikoa mbalimbali hapa nchini waliohudhuria mkutano mkuu wa chama hicho uliofanyikia kwenye ukumbi wa mikutano wa hoteli ya Lion iliyopo Sinza jijini Dar-es-salaam.(Picha na Nathaniel Limu).

“Nasikitika kusema kwamba wanachama wengi hawaitendei haki JET. Hawaandiki habari wala makala zinazohusu uboreshaji wa mazingira, utunzaji wake na madhara yatokanayo na uharibifu wa mazingira.Wengi ni wanachama wa JET kwa ajili ya kuhudhuria tu mkutano mkuu”,alifafanua mwenyekiti huyo ambaye ametamka wazi kuwa mwakani,hatagombea nafasi hiyo.

Kwa upande wake katibu wa JET, Christom Rweyemamu alisema wanachama wengi wanalipa ada zao kwa shida sana, hata wanapokumbushwa,hawalipi kama inavyotakiwa.

“Aidha,wafadhili wa kugharamia shughuli zetu nao wanaendelea kupungua.Kwa hiyo kuna haja kubwa kujiangalia upya huko tuendako”,alisema.

Kwa mujibu wa katibu mtendaji mkuu wa JET,John Chikomo, katika mwaka wa fedha wa 2014, JET inatarajia kukusanya mapato ya zaidi ya shiligi 219.7 milioni kutoka mapato yake mbalimbali ikiwemo ada ya wanachama.Matumizi yanatarajiwa kuwa shilingi 215,899,800.