Wakazi
wa manispaa ya Shinyanga mkoani Shinyanga wamezilalamikia zinazozalisha maji
katika manispaa hiyo kutokana na maji kukatwa kwa zaidi ya siku tano bila
taarifa yoyote hali inayowakwamisha kufanya kazi zo za maendeleo.
Wakizungumza
na Malunde1 blog kwa nyakati tofauti, wakazi hao wamezitupia lawama mamlaka zinazo
zalisha na kusambaza maji Shinyanga (Shuwasa) na (Kashwasa), kwa kushindwa
kutatua tatizo hilo la maji mapema na kuwaacha wateja wao wakiendelea kutaabika
kwa kukosa maji.
Walisema
tatizo hilo la uhaba wa maji limekuwa kero kwao, hali ambayo imekuwa ikiwamisha
kufanya shughuli zao za maendeleo na kupoteza muda mwingi wakitafuta maji
pembezoni mwa mji, na wakati mwingine kulazimika kutumia maji ya visima vya maji
ambavyo havina usalama.
“Tunasikia
tu kuna hitilafu ya umeme,tunasikitika kwa kukosa maji zaidi ya siku tano,
ankara za maji tunalipa kwa wakati, lakini huduma tunayopewa na mamlaka hizi ni
mbovu, tena wanakata maji bila taarifa na hatujui tatizo linalosababisha tukose
huduma ya maji, na kutufanya tuishi kwa shida” alieleza Halima Maganga mkazi wa
Ndala.
“Hivi sasa tunalazimika kununua dumu la lita 20 shilingi 800/= au 1000/=,na wakati mwingine tunalazimika kutumia maji ya madimbwi au visima,maji ambayo kimsingi sio salama”,aliongeza Tungu Manyongo mkazi wa Bugayambelele.
Akizungumzia
malalamiko hayo mkurugenzi wa Mamlaka ya maji Safi na usafi wa Mazingira
manispaa ya Shinyanga (SHUWASA), Sylivester Mahole, ambao ndiyo wanasambaza
maji mjini Shinyanga, alisema tatizo hilo la ukosefu wa maji limetokana na mitambo
ya mamlaka ya usambazaji maji katika miji ya Shinyanga na Kahama (KASHUWASA) kuharibika
na kushindwa kuzalisha maji.
Mahole
alisema baada ya kupa taarifa za kuharibika kwa mitambo ya kuzalishia maji
kutoka kwa wenzao (KASHUWASA), ndipo walipoamua tarehe 8,mwezi huu kuanza
kutumia vyanzo vyake vya zamani vya bwawa la Ning’wa kusambaza maji mjini humo,
ambayo hata hivyo nayo hayakidhi mahitaji ya wakazi hao.
Aidha
kwa upande wake mkurugenzi wa mamlaka ya usambazaji wa maji kwa Miji ya
Shinyanga na Kahama (KASHUWASA) Clement Kivegaro ambao wanazalisha maji hayo ya
ziwa Victoria na kuwauzia (SHUWASA), alikiri kuwepo kwa tatizo kwenye mitambo
hiyo ya kuzalisha maji.
Alisema
hali hiyo imetokana na hitilafu ya umeme na hivyo mitambo hiyo kukosa nguvu ya
kuzalisha na kusukuma maji.
Hata
hivyo Kivegaro alisema tatizo hilo hivi sasa lipo kwenye matengenezo huku
wakishirikiana na Shirika la umeme Tanesco, kwa ajiri ya kupata ufumbuzi wake
ili wananchi waendelee kupata huduma ya maji safi na salama kama kawaida, huku
akibainisha kuwa hajui lini suluhu yake itapatikana .
Na Kadama Malunde-Shinyanga
Social Plugin