 |
| Joseph Mahundi akifanya mazoezi kama moja ya ratiba zake za kila siku |
 |
| Joseph Mahundi akishangilia bao na wachezaji wenzake |
Kiungo
wa timu ya Coastal Union, Joseph Mahundi alichaguliwa kuwa mchezaji
bora wa mwezi Disemba 2014 wa Ligi Kuu ya Vodacom (VPL) inayoendelea
kutimua vumbi kwenye viwanja mbalimbali nchini.
Mahundi
alitoa mchango mkubwa kwa timu yake ya Coastal Union mwezi Disemba
mwaka jana na kuchaguliwa na jopo la makocha linalofanya kazi ya
kuchagua mchezaji bora wa kila mwezi.
Kwa kuibuka mchezaji bora, Mahundi
atakabidhiwa zawadi ya shilingi Milioni 1 na kikombe katika mechi ya Coastal
Union dhidi ya Azam.
Vodacom Tanzania imefanya mahojiano mafupi na John Mahundi na
unaweza kusoma hapa chini kumjua zaidi.
Vodacom-Tupe historia yako Mahundi
Mahundi-Nina
umri wa miaka 24, nilianza kucheka soka timu ya mtaani inaitwa Matalawe
nikiwa na umri wa miaka 17, baadaye nikachaguliwa kucheza Copa Coca Cola
mwaka 2008 na Ruvuma tukapata ubingwa.
Tulitoka mimi na wenzangu watatu
kutoka Ruvuma. Nikaitwa kikosi cha Serengeti Boys na kuna wakati
tulikwenda Brazil.
Tuliporudi mimi nikajiunga na Azam U20, nilikaa Azam
FC miaka 3 kukatokea mgogoro tukawa hatuko tena Azam.
Nikachukuliwa
Friends ligi daraja la pili, katika dirisha dogo la mwaka huo
nikasajiliwa Villa. Sikucheza Villa muda mrefu nikasajiliwa Coastal
Union mwaka juzi lakini baada ya muda nikasajiliwa Ashanti.
Mwaka jana
nikapata tena nafasi ya kusajiliwa Coastal Union ambapo nipo hadi leo.
Vodacom-Nani amekuhamisha kufikia hapa ulipo?
Mahundi-Mimi
naamini katika kujifunza, kusikiliza watu, kufanya mazoezi kwa bidii na
kumuomba Mungu. Nilipokuwa nikicheza nilikuwa natamani na kuwaangalia
wachezaji kama John Bocco na Sure Boy wanavyocheza ili niwe kama wao.
Vodacom-Unaamini katika ndumba?
Mahundi-Katika mpira siamini kama kuna ndumba mimi naamini katika kumuomba Mungu na kufanya mazoezi kwa bidii.
Vodacom-Ikitokea umepigwa ‘’tobo’’ uwanjani unajisikiaje?
Mahundi-Ah! ni jambo la kawaida katika mpira, mchezaji wa timu pinzani akinipiga tobo ni kwamba kaniwahi tu.
Vodacom-Utajisikiaje siku ukiitwa Taifa Stars?
Mahundi-Nitajisikia
vizuri sana kwasababu nimewahi pia kucheza Serengeti boys, inapendeza
na inafurahisha unapovaa jezi kuwakilisha Taifa lako.
Vodacom-Unadhani kwa umri ulionao na hapo ulipo umechelewa au bado upo mahali sahihi kulingana na umri wako?
Mahundi-Ninaamini bado sijachelewa, nina miaka 24 na ninaona ninaelekea pazuri.
Vodacom-Unawashauri nini vijana ambao bado wanacheza mchangani?
Mahundi-Wasikate tamaa wafanye juhudi zaidi na zaidi.
Unaweza kufuatilia makabidhiano hayo fuata ukurasa wa Vodacom wa Facebook kwa kubofya hapa www.facebook.com/tzvodacom.
Mchezaji mwingine atakaekabidhiwa zawadi Jumapili wiki hii ni Said Bahanuzi ambaye aliibuka mchezaji bora mwezi Januari 2015.