KIGOGO WA CCM ATOBOA SIRI KUBWA YA CCM KUSHINDWA KWENYE UCHAGUZI, ATOA ONYO KALI KWA VIONGOZI

Chama Cha Mapinduzi (CCM ) mkoa wa Shinyanga kimewaonya viongozi wake kuacha  kuwachagulia wananchi wagombea na baadala yake waache wananchi na wanachama wa CCM wachaguwe wenyewe viongozi wanaowataka hususani katika kipindi hiki cha kuelekea kwenye uchaguzi mkuu 2015 wa udiwani ,ubunge na urais.

Kauli hiyo  ilitolewa jana  na mwenyekiti wa CCM mkoa wa Shinyanga  Khamis  Mgeja wakati akizungumza na wananchi wa kijiji cha Mishepo kata ya Mwantini wilaya ya Shinyanga katika maadhimisho ya  miaka 38 ya chama hicho.

Mgeja alisema kitendo cha viongozi wa CCM kuwachagulia wananchi wagombea wanaowataka wao ndiyo chanzo cha CCM kushindwa katika uchaguzi kwa baadhi ya maeneo katika uchaguzi wa serikali za mitaa uliopita.

"Ni ukweli usiopingika kwamba CCM  katika uchaguzi wa serikali za mitaa  CCM tulifanya vizuri na kushinda kwa kishindo sehemu ambazo tuliteua wagombea ambao ni chaguo la wananchi ,tulipo shindwa kwa kiasi kikubwa tuliteua wangombe ambao ni changuo la viongozi",alieleza Mgeja.

 Mgeja alisema katika uchaguzi wa serikali za mitaa ilikuwa kama dakika 45 za kipindi cha kwanza na sasa ni mapumziko kuelekea kipindi kingine cha dakika 45 ambacho ni kuelekea uchaguzi mkuu mwaka huu 2015 hivyo kuwataka
  WanaCCM  kufanya tathmini ya kubaini kasoro na mafanikio ya uchaguzi wa serikali za mitaa uliopita.

“ Nawakumbusha wanachama na viongozi mtambue siasa ni sawa na gemu la mchezo, sasa ni vyema benchi la ufundi ambalo ni  halmashauri kuu za matawi,kata wilaya, mkoa na mpaka taifa watumie kipindi hiki cha mapumziko kurekebisha kasoro zilizojitokeza katika uchaguzi uliopita ili kujirekebisha katika uchaguzi mkuu ujao na kupata  ushindi wa kutosha’’,alieleza Mgeja.

Mwenyekiti huyo alisema silaha kubwa ya ushindi ni kujenga umoja, mshikamo ndani ya chama na kuondoa sumu ambazo ni mbaya na zinazopelekea kukigharimu chama kama zile za ubinafsi, chuki na makundi.

"Tuombe sasa wanachama wa CCM watimize wajibu wao kulinda chama na kukitetea pia na kuyazungumza mafanikio yaliyopatikana katika kipindi cha  miaka 38 ya CCM na kupata mafaniko makubwa ya kimaendeleo katika nyanja zote za elimu ,afya ,miundombinu ya barabara ,maji na nishati za umeme na huduma mbalimbali za kijamii,"alieleza Mgeja.

Katika hatua nyingine alisema katika mafanikio hayo CCM mkoa wa Shinyanga inawapongeza,madiwani wabunge ,Mheshimiwa rais Jakaya Mrisho Kikwete kwa kutekeleza ilani ya CCM kwa mafanikio makubwa,na kuwafanya wanaCCM kutembea kifua mbele .

Aidha Mgeja aliwataka viongozi na wana ccm kutotembea na majina ya wagombea kwenye mikoba yao,na ni vema kama wapo wajitokeze wao wenyewe  ili wananchi na wanachama wa CCM waweze kuwapima kwa uwezo wao ,lakini watambue kuwa muda wa kampeni bado .

Na Kadama Malunde-Shinyanga

Download/Pakua/Install App ya Malunde 1 blog Google Playstore Bofya Hapa

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia malundekadama@yahoo.com