Na Dotto Mwaibale, Singida
KAIMU Afisa Vijana Mkoa wa Singida, Frederick Ndahani amewataka wazazi na walezi kujenga tabia ya kuwapa watoto wao mlo kamili badala ya chipsi.
Ndahani alitoa ombi hilo jana katika mahafali ya Elimu ya Awali ambapo alimwakilisha Mkuu wa Mkoa wa Singida Dkt.Rehema Nchimbi.
"Nawaombeni wazazi na walezi waleeni watoto katika maadili mema, mkizingatia mlo kamili kuliko kuwapa chipsi" alisema Ndahani.
Aidha Ndahani aliwaambia wazazi hao wajenge tabia ya kuwashirikisha watoto hao katika michezo mbalimbali kwani inawajenga kiakili na kiafya.
Akizungumza suala la matumizi ya TV kwa watoto aliwaambia wazazi hao wawe wakiwatafutia vipindi vya kuwajenga watoto badala ya kuangalia katuni zinazofundisha tabia mbaya ikiwemo wizi,ukorofi,ugaidi, uchoyo na hata ngono.
" Kuweni makini na hizi katuni ambazo hazina maadili kwa watoto ni bora watoto waangalie katuni zetu za kitanzania zilizodhibitishwa na Taasisi ya Elimu Tanzania na si hizo za nje ambazo hazina maadili ya kwetu" alisema Ndahani.
Ndahani aliwaomba wazazi hao kuwajenga watoto wao katika uzalendo na kupenda Taifa na wazazi wao.
Akizungumzia tabia za watoto waliokosa maadili alisema katika baadhi ya familia wamekuwa wakiwaendesha wazazi wao kwa kupanga kila kitu na kipi akifanye na kipi asikifanye huku wazazi wakiwaangalia tu.
Mkuu wa Shule hiyo Sister Malietha aliwaomba wazazi hasa wakina baba kujenga tabia ya kukagua kazi za shuleni za watoto wao badala ya kuwaachia wakina mama pekee kwani malezi ya mtoto lazima yawashirikishe wazazi wote.