📌 Amshukuru Rais Dkt. Samia kwa nyenzo na maelekezo
📌 Ahadi ya Rais ya umeme wa kutosha yatimizwa, sasa hakuna mgawo wa umeme
📌 Aziwashia taa nyekundu kampuni tanzu za TANESCO
📌 Ataka Wataalam kutumia maonesho kutatua kero si kurekodi
***
Naibu Waziri Mkuu na Waziri wa Nishati, Mhe. Dkt. Doto Biteko amefungua rasmi maonesho ya Wiki ya Nishati katika Viwanja vya Bunge jijini Dodoma ambapo amemshukuru Rais, Dkt. Samia Suluhu Hassan kwa kuimarisha Sekta ya Nishati kutokana na nyenzo na maelekezo anayoyatoa ambayo yamempambanua kama kiongozi anayetatua matatizo ya wananchi kwa kutenda zaidi na sio maneno.
Dkt. Biteko amesema maelekezo ya Rais, Dkt. Samia pamoja na nyenzo anazozitoa kwa Wizara ya Nishati zimepelekea nchi sasa kuwa na umeme wa kutosha na kwamba hakuna mgawo tena huku kukiwa na mitambo ambayo ipo standby kuwashwa pale inapotokea hitilafu kwenye mitambo mingine ya uzalishaji umeme.
Aidha, kwa mikoa ambayo ipo nje ya gridi ya Taifa ikiwemo Katavi, Rukwa, Kigoma, Lindi na Mtwara, amesema kuwa yote itaunganishwa kwenye gridi ya Taifa kwani Rais, Dkt. Samia ameshatoa fedha za kutekeleza miradi ya umeme itakayoiunganisha mikoa hiyo na gridi ambayo tayari inaendelea.
Katika hatua nyingine, Dkt. Biteko ameipongeza TANESCO kwa kuendelea kuimarisha utendaji kazi wao ikiwemo utatuzi wa changamoto za umeme akitolea mfano athari iliyotokea katika gridi ya umeme usiku wa siku ya Pasaka kutokana na hitilafu kwenye mfumo wa kudhibiti kiwango cha maji kwenye mitambo ya Kidatu ambapo tatizo hilo lilipaswa kushughulikiwa kwa siku tatu lakini TANESCO ilifanya jitihada na kutatua changamoto hiyo kwa muda wa masaa kadhaa.
Pamoja na pongezi hizo Dkt. Biteko ametoa angalizo kwa kampuni tanzu za TANESCO kuhusu utendaji kazi wao ikiwemo Kampuni ya Uendelezaji wa Jotoardhi Tanzania (TGDC) ambapo kampuni hiyo ilitoa ahadi ya kuanza uchorongaji wa visima vya Jotoardhi katika eneo la Ngozi Mbeya tarehe 1 Aprili 2024 lakini bado hawajaanza kazi hiyo hivyo amemuagiza Katibu Mkuu wa Wizara ya Nishati kuisimamia ipasavyo kampuni hiyo ili nchi iweze kupata umeme wa Jeothemo.
Pamoja na uendelezaji wa Sekta ya Umeme, Dkt. Biteko amesema kuwa Wizara inaendelea na utekelezaji wa mipango mingine ikiwemo wa nishati safi ya kupikia ambapo Baraza la Mawaziri limeshapitisha Mpango Mkakati wa Nishati safi ya kupikia na sasa kinachofanyika ni utekelezaji ili asilimia 80 ya wananchi watumie nishati safi ya kupikia ifikapo mwaka 2033.
Katika Sekta ndogo ya Gesi Asilia amesema kuwa, usimamizi madhubuti unaendelea ambapo chini ya Serikali ya Awamu ya Sita, imetolewa leseni ya uchimbaji wa Gesi asilia katika kisima cha Ntorya mkoani Mtwara huku leseni ya mwisho ikiwa imetolewa mwaka 2006.
Kuhusu Maonesho ya Wiki ya Nishati, Dkt. Biteko amewaagiza Wataalam kuwa, pamoja na kueleza utekelezaji wa mipango ya Serikali na mipango mipya iliyopo lakini wanapaswa kutatua na kujibu hoja mbalimbali za Wananchi na Wabunge na si kuzichukua ili kuyapa thamani maonesho hayo.
Vilevile, amewapongeza Wabunge wote kwa usimamizi wa karibu wa Sekta ya Nishati na kufuatilia kwa karibu utekelezaji wa miradi mbalimbali pamoja na utatuzi wa kero zinazowahusu wananchi.
Kwa upande wake, Naibu Spika wa Bunge. Mhe. Mussa Zungu amepongeza Wizara ya Nishati na Taasisi zake kwa Maonesho hayo hususan matumizi ya teknolojia ya kisasa katika kuhifadhi taarifa mbalimbali ikiwemo taarifa za maeneo yenye umeme, yasiyo na umeme, mfumo wa gridi n.k suala linalowezesha taarifa hizo kupatikana kwa urahisi na kwa haraka pale zinapohitajika.
Ameeleza kuwa, Bunge litaendelea kufanya kazi kwa karibu na Serikali na kuhakikisha fedha za kutekeleza miradi mbalimbali zinapatikana .
Pia amempongeza Rais, Dkt. Samia Suluhu Hassan kwa kutimiza ahadi yake ya uwepo wa umeme wa uhakika nchini kwani suala hilo sasa limeonekana kwa vitendo na malalamiko ya wananchi kuhusu changamoto za umeme yamepungua na pia kwa nia dhati ya kuamua kumtua mama kuni kichwani kwa kutekeleza ajenda ya nishati safi ya kupikia.
Viongozi mbalimbali walioambatana na Naibu Waziri Mkuu na Waziri wa Nishati katika uzinduzi huo ni Waziri wa Nchi, Sera, Bunge na Uratibu, Mhe. Jenista Mhagama, Naibu Waziri wa Nishati, Mhe. Judith Kapinga, Wenyeviti wa Kamati mbalimbali za Bunge, Wajumbe wa Kamati mbalimbali za Bunge na Katibu Mkuu wa Wizara ya Nishati, Mhandisi Felchesmi Mramba.
Social Plugin