WALENGWA WA TASAF SHINYANGA WAPONGEZA MRADI WA BARABARA YA TANESCO - SANJO, WAPATA FAIDA ZA KIUCHUMI NA HUDUMA BORA

Na Kadama Malunde - Malunde 1 blog

Walengwa wa Mpango Kunusuru Kaya Maskini unaoratibiwa na Mfuko wa Maendeleo ya Jamii (TASAF) katika Halmashauri ya Manispaa ya Shinyanga wameeleza kupata manufaa makubwa kutokana na utekelezaji wa Mradi wa Ujenzi wa Barabara ya Mashema (Mtaa wa TANESCO) katika kata ya Chamaguha.

Mradi huu, uliofadhiliwa na TASAF kupitia ajira za muda mfupi, umeweza kufungua fursa za kiuchumi kwa wakazi wa mtaa huo kwa kuwapa malipo kwa kazi walizofanya, huku baadhi yao wakijiongezea mapato kupitia shughuli za kilimo na biashara.

Barabara hii yenye urefu wa kilomita 2 inayoanzia Mtaa wa TANESCO na kuunganisha mtaa wa Sanjo kata ya Chamaguha imesaidia kupunguza usumbufu wa usafiri ambao awali ulilazimu wakazi kutafuta njia ndefu.

Katika mahojiano na waandishi wa habari Novemba 8, 2024, walengwa wa TASAF wamesema, ujenzi wa barabara hiyo yenye urefu wa kilomita 2 umewezesha wakazi wa mtaa wa TANESCO na Sanjo kuepuka umbali mrefu wa kupita maeneo mengine, jambo ambalo lilikuwa linawaathiri hasa kwa upande wa usafiri.

Martha Daniel Chacha, mmoja wa wakazi wa mtaa huo, amesema kuwa kabla ya mradi, eneo hilo lilikuwa na majaruba, lakini sasa ni rahisi kufika kwenye huduma muhimu kama zahanati ya Chamaguha hivyo imewezesha wakazi kuepuka vikwazo vya usafiri.

Aidha walengwa wameeleza furaha yao kwa kupata malipo mazuri ya kazi walizofanya na wameomba miradi mingine kama hiyo iendelee ili kuboresha hali ya maisha yao zaidi.

Tabu Buganga Malaba

"Ufuatiliaji wa mradi ulikuwa mzuri, tulilipwa kwa wakati. Tunashukuru TASAF kwa kuturahisishia maisha yetu, tunaomba mradi mwingine uje ili tuendelee kunufaika," amesema Tabu Buganga Malaba na Gigwa Masingija, miongoni wa walengwa.

Fundi Msimamizi wa Ujenzi wa Mradi huo, Paul Ramadhani, pia amepongeza usimamizi mzuri wa mradi, na kusema kwamba ufanisi ulioonekana unatoa picha nzuri kwa miradi ya baadaye.

Mwenyekiti Mstaafu wa Mtaa huo Suleiman Mzee, ameiomba serikali iendelee kutekeleza miradi mingine ya barabara kwani mahitaji bado yapo.

Octavina Kiwone

Kwa upande wake, Mratibu wa TASAF Halmashauri ya Manispaa ya Shinyanga, Octavina Kiwone, amesema kuwa barabara hiyo imejenga daraja la kiuchumi na kijamii kwa wakazi wa Chamaguha na kuunganisha jamii na huduma muhimu.

Afisa Mtendaji wa Mtaa wa TANESCO, Bundala Shija, amefafanua kuwa Mradi wa Ujenzi wa Barabara ya Mashema, wenye urefu wa mita 2,000, ulianza kutekelezwa tarehe 7 Desemba 2022 na kukamilika kwa asilimia 100 tarehe 12 Mei 2023.

Mradi huu uligharimu jumla ya shilingi 13,860,500/- kwa ajili ya kuanzisha mradi, kulipa walengwa, na kununua vifaa vya ujenzi.

Akizungumza kuhusu utekelezaji wa mradi, Shija amesema, “Mradi huu wa barabara ni sehemu ya ajira za muda zilizofadhiliwa na TASAF, ambapo utekelezaji ulisimamiwa na Kamati ya Usimamizi ya Jamii kwa kushirikiana na mtoa huduma au fundi ngazi ya jamii, kwa niaba ya serikali ya mtaa. Walengwa 114 walishiriki katika ujenzi, ingawa baadhi yao hawakujitokeza."

Afisa Mtendaji wa Mtaa wa TANESCO, Bundala Shija

Ameongeza kuwa kutokana na ubora wa kazi iliyoonyeshwa, TARURA ilichukua hatua ya kuiboresha barabara zaidi kwa kuweka moramu na kalvati, hivyo kuhakikisha barabara inapitika muda wote, hata katika hali mbaya ya hewa.

Shija pia ameomba TARURA kuendelea kuboresha barabara zingine katika eneo hilo na maeneo mengine, ili kuendelea kuboresha miundombinu na maisha ya wananchi.

“Tunaiomba TARURA iendelee kutufikishia maendeleo kwa kuboresha barabara nyingine zinazohitaji msaada. Hii itasaidia sana katika kukuza uchumi wa eneo letu,” amesema Shija.

Kwa jumla, mradi huu umeonyesha jinsi miradi ya miundombinu inayofadhiliwa na TASAF inavyoweza kuwa chachu ya maendeleo, hasa kwa walengwa wa Mpango Kunusuru Kaya Maskini, na kuleta mabadiliko chanya katika jamii.

Mratibu wa TASAF Halmashauri ya Manispaa ya Shinyanga, Octavina Kiwone akiwaelezea waandishi wa habari kuhusu barabara ya Mashema inayounganisha Mtaa wa TANESCO na Sanjo katika kata ya Chamaguha.

Mratibu wa TASAF Halmashauri ya Manispaa ya Shinyanga, Octavina Kiwone akionesha miti iliyopandwa na Walengwa wa TASAF pembezoni mwa barabara ya Mashema inayounganisha Mtaa wa TANESCO na Sanjo katika kata ya Chamaguha.

Martha Daniel Chacha akielezea faida wanazopata kupitia barabara ya Mashema inayounganisha Mtaa wa TANESCO na Sanjo katika kata ya Chamaguha

Waandishi wa habari, maafisa kutoka TASAF wakitembelea barabara ya Mashema inayounganisha Mtaa wa TANESCO na Sanjo katika kata ya Chamaguha Manispaa ya Shinyanga

Muonekano wa sehemu ya barabara ya Mashema inayounganisha Mtaa wa TANESCO na Sanjo katika kata ya Chamaguha Manispaa ya Shinyanga

Afisa Mtendaji wa Mtaa wa TANESCO, Bundala Shija akitoa taarifa kuhusu ujenzi wa barabara ya Mashema inayounganisha Mtaa wa TANESCO na Sanjo katika kata ya Chamaguha

Mwenyekiti Mstaafu wa Mtaa wa TANESCO kata ya Chamagusa Suleiman Mzee akiomba serikali iwapatie miradi mingine ya barabara

Fundi Msimamizi wa Ujenzi wa Mradi wa ujenzi wa barabara ya Mashema inayounganisha Mtaa wa TANESCO na Sanjo katika kata ya Chamaguha, Paul Ramadhani akielezea namna walivyojenga barabara hiyo kwa ufanisi mkubwa